LEI TROUBAIRE MARSIHÉS Obro deis Encian, un Eissame de ...

Ph. Chauvier
Pistachié
Lou gau de Galidoun
— Coumo va que lou gau dóu vesin Galidoun
Toujour, toujour, pito nouàsti galino?
A soun paire disié la pichouno Didoun.
— Ma fiho, aqui dessus faguè mèste Sardino,
Entrepres coumo un pèis dintre lou capeiroun,
Es pèr li tua lei pepidoun.
Lou Retour
Quauqueis an aprè soun mariàji,
Mèste Tribord qu'èro un galoi marin,
En si retournant d'un long viàji,
Anavo à soun oustau en cantant un refrin.
Pensavo à seis enfant, à sa fremo adourado;
Deja li fasié tout countent
Milo bouonei brassado;
Car leis avié plu vis despuei pa mau de tèmp.
Doun, arribo à l’oustau, intro dins la chambreto,
Pèr faire uno suspresso à sa bravo fremeto;
E trovo sa mouiè couchado dins lou lié,
Emé Jirome lou groulié.
Pensas se si senté bouihi lei vermichèli...
Furiéu, s'avanço dóu chachèli;
Vòu, dins lou pies, li tanca soun coutèu;
Mai lèu sa fremo, coumo un diable,
Sauto dóu lié, toumbo su d'èu,
E li retèn lou bras, diant d'un èr esfraiable:
Arrèsto, arrèsto, maufatan!...
Aquèu que vas tua, miserable,
— Es lou paire de teis enfant!
*