LEI TROUBAIRE MARSIHÉS Obro deis Encian, un Eissame de ...

(An'aqueou moumen Piarre Puget, l'escultour, arribo su la plaço Novo en venent de la Croto de
Vilàgi).
GASPARD PUGET
Eou! mé toun soun talènt n'a pas tant rabaia.
S'avié fa coumo ieou aourié mai de dardeno.
PIARRE PUGET (l’escultour)
Bonjour, touei dous... Gaspard, as mai la bouco pleno
De l’argènt qu'as gagna en fènt basti d’oustaou.
Tu, dins uno obro vies rèn que lou capitaou
Que ti vèn.
GASPARD PUGET
… De gros mot!... Ieou dieou sènso façoun:
Quand travaias es pèr vous enfla lou boussoun.
Tambèn faou prene leou lou travai que lou riche
Vous pouarge, mume s’en vous pagant vous esquiche.
Lei gènt que fan basti vouélon tout lou lançoou
Va saben, e aoussi ni n'en fas pèr sei soou!
Mai èstre testard coumo as fa emé la coumuno
Es sens prepaou vira l'esquino à la fortuno:
Lei consou ti disien: Voulen un taou travai
Que l’ague fouesso d'art; mai vous dounan pas mai.
Un coumerçant plastra disié: dins d’aqueou mabre
Puget, fès de moun grand, revieoure lou cadabre...
De bellei pacho ensin pourriéou t'en cita dès
Qu'as pas vougudo faire en pretèsto doou près.
Tambèn après agué barroula ta carcasso
Un paou pertout à Roumo, à Paris, es pas grasso…
As just amoulouna pèr pas creba de fam
E laissaras qu'un troué d'oustaou à teis enfant;
Aqui l'a pas de que marcha la cambo redo!...
Douei milo escu basti es touto la mounedo
Qutaou bout de quaranto an, grand ome, as amaga,
Ieou, en pas tant de tèmp sènso troou fa paga,
Sènso fa d’estampeou, n'ai rabaia siei milo;
E tè! lou cousin Piarre, eu laourant pèr la vilo
A sachu s'acampa tres milo escu d’oustaou
Faou gagna fouesso argènt, scultour vo tapo-traou.