LEI TROUBAIRE MARSIHÉS Obro deis Encian, un Eissame de ...

P. -C. Gardano.
Moun fraire mi disié: s'erès pa'n foutu pouar.
Tu que chimes lou la, fariès manja la saoumo.
Tant pis se per lou coou passi per un gros pouar:
Estàqui leis anoun, tèti toujou la saoumo.
Jùri, tant que vieourai, dins l'oustaou l'aoura'n pouar;
Tant que vieoura ma sur, tamben l'aoura'no saoumo:
Veiren de paire en fieou flouri lei Saoumo e Pouar.
Lei Tres Puget
Sceno
PERSOUNAGI:
Piarre Puget, escultour, pintre e architèito.
Gaspard Puget, architèito.
Piarre Puget, maçoun.
La scèno si passo un deminche matin d'iver sus la plaço Novo, mounte lei marsihès vènon si
caoufa aou soulèou. Aquelo plaço es separado doou port pèr la carriero de Jerusalem emé sa tiero
d'oustaou. Aoussi fouessei gènt l'arribon de dessus lou port en travessant un passagi que li dien la
Croto de Vilàgi. Sian en 1680.
Gaspard Puget si proumeno sus la plaço.
Piarre Puget, lou maçoun, arribo.
PIARRE PUGET (lou maçoun)
Bouenjour, cousin Gaspard, coumo va la famiho?
GASPARD PUGET (l'architèito)
Touti van à souvèt, mouié, pitoué 'mé fiho.
Iéou siéou lou plus malaout; vies que sian touti bèn:
L'obro es verai va plan, mai aven proun de bèn
Per pas fouesso soufri dei pichounei chavano.
PIARRE PUGET (lou maçoun)
Oh! sàbi qu'as sachu li rabaia de grano.
Tè! cousin Piarre vèn aoussi si souleia.