LEI TROUBAIRE MARSIHÉS Obro deis Encian, un Eissame de ...

Marius Pécoult.
Aro pourrès mai fa cousino
Fès vous rousti quaouquei galino,
Manjas, buvès, tenès vous siaou:
N'en mourra que lei pu malaou
Surtout riguès lou mai poussible
Se trouvas lou mounde risible...
E ben à vous, brave moussu,
Leou, fugi, couar, signi sans plu.
LOU GAJET & LOU CASSAIRE
Meste Sabato, m'an counta
Qu'estent groulié de soun eta,
Emé proun pèno e proun paciènci,
De maou, de temp e foueço sciènci,
Avié fa d'un joueine gajet
Un veritable parrouquet.
Qu saoup ce que li fasié dire?
De ben, de maou, de mot per rire.
Un beou dilun que lou groulié,
Luègo d'adouba de soulié,
Vous festejavo à la cantino
Bacus e lou rai de la tino,
Soun escoulian fiché lou camp
Per ana prene l'er dei champ.
Vis un beou boues, li voulastrèjo
E de branco en branco saoutèjo,
Pitant l'aglan de temp en temp,
Tout galoi e mai que countent.
Mai, pesto, veici qu'un cassaire,
S'en marfisavo pa, pecaire,
Doou beou mitan d'un roumanieou,
Ti li mando un coou de fusieou.
Lou paoure gajet subran toumbo,
Cresent veire duerbi sa toumbo
E coumo n'èro que blessa
Quielavo coumo un espessa.
Noueste cassaire s'en aprocho.
Per l'acaba, lou metre en pocho.
Mai coumo li mando la man,
L'oouceou si reculant d'an pan,