LEI TROUBAIRE MARSIHÉS Obro deis Encian, un Eissame de ...

Lou Mandaire de Pié
Moun brave Moussu Todoro.
Bor que n'ai reçu lou papié
Mounté mi dias: Manda de pié!..
Ai leou près mei cambo à moun couèle
E, tout courent, à mita fouele
Toumbant co de l'ome dei soou
L'ai di: Moussu, aquestou coou
L'a pa de repetun que tengue,
Voueli d'escu!... foou que n'en vengue
Vo senoun va devessi tout…!
Vous garci lou fué dei douei bout;
Foou saouta l'oustaou, la barraco...
Vous trati de vieiho macaco;
Meti contro vous lou quartié,
Va voou dire à la pescarie.
Lei frumo vendran su la plaço
Faire de vous un sa d’estrasso,
Vous grafinant, creidant: Rascas…!
Cercaren lou jugi de Pas,
Lei gendarmo puei la pouliço!...
E diguès pa que sias à Niço
Que l'a de garri, que sei traou
Fan de courradou din l'oustaou:
S'en fouten coumo de Felipo!
Ensin, n'a proun, lacha la pipo,
E fès mi leou un papafar
Mounté recoueneirès, ben clar,
Que, lou seze de la mesado,
Avès prega lou cambarado
Que per vous si tent à Paris,
De paga subran, senso un cris,
A Moussu Todoro, pecaire,
Que men d'aco poou plu ren faire,
Cinq pouli bihet de cent franc.
Avès signa?... touca la man,
Sias un brave ome, vous pardouni...
Tè, m'agradas, tamben vous douni
Un gros bounjou, pouarta-vous ben,
Se si vian plu tant s'escrieouren.
E zou! larguant la vieiho banco
Mounté lou beou Chichieou si tanco
Veni debana tout acot
Taou que va repèto un jacot.