LEI TROUBAIRE MARSIHÉS Obro deis Encian, un Eissame de ...

L'Estournèu
Anerian cassa l'autre dimenche dins lei couelo de Masargo: iéu, Chouas, Jan emé soun nebou
Zulo.
Chouas nous digué:
— Fau qu'à miejour siegui de retour en vilo qu'ai de quichié, mai m'en anarai pa que noun agui au
mens un aucèu dins ma biasso…
Lou tèmp èro pa tròu favourable, bord que faguerian quasimen muso. Lou promié qu'estrené
sigué Jan que tugué un rigau puei un cuou rousset; iéu, un fifi em' un trouesse-couele e Chouas,
qu'avié jusqu'aro tua que lou tèmp, fumavo la pipo.
Coumo siéu en trin de regarda l'ouro à ma cebo, qu'acoumençàvi de mi faire viei, èro des ouro, e
que vouliéu tambèn m'entourna emé Chouas, aquestou tiro subran un còu de fusiéu que raté pa;
l'aucèu ané toumba dins un abroua au pèd de la couelo e pèr l'ana rabaia lei cabro segur aurien pa
pres lou camin de rescourchi, talamen l'avié d'arrisco de si roumpre la barro dóu couele.
Coumo si fasié tard, demanderian à Jan se descendié emé nautri. Aquest qu'avié fa
lou crano tout lou matin e sorti sa casso au mens vint còu pèr si trufa de Chouas,
nous respouondé que restavo encaro un pau; maugra 'cò, envejous de saupre ce que
Chouas venié de tua, digué à soun nebou de nous segui jusqu'au dabas de la couelo.
Mai avan d'arriba à l'abroua, Zulo s'arresté qu'èro las; un pau pu luen, Chouas atrovo l'aucèu, lou
pren, lou raluco e l'estreme dins sa biasso, puei mete sei man à la bouco pèr s'en faire un pouartovouas
e creido à Zulo:
— Diras à toun ouncle qu'es un estournèu!
Touano Mazzella
Servi de soun plat
Pèr uno bello matinado d’abriéu,
Un bouon viei de païsan dins soun bèn samenavo
E tout en samenant cantavo,
Cantavo pèr lausa Diéu!
Passo dous farluquet capèu aut'mé faquino
Que dóu viei vouelon si trufa,
Li dien: — Diéu fa bèn ce que fa;
Se clines toun esquino
Es pèr nautrei, va crèses pa bessai,
Cadun soun lot, coumpaire,
Tu, sies naissu pèr lou travai,
E nautrei pèr rèn faire.
Dins quauque tèmp d'eicit
E sènso souidamen que ti digon merci
Ta recorto vendra rempli nouesto bedeno!