LEI TROUBAIRE MARSIHÉS Obro deis Encian, un Eissame de ...

PAJO ESTRAIADO
Marsiho Franceso
Muso, de tei poutoun de flamo
Inspiro moun epitalamo
Per la plus bello deis amour,
Espandisse coumo de roso,
Aousso fin-qu'à l'apouteoso
Lei vers de l'umble troubadour!
Vuei s'unisson doues inoucenço,
L'ilo de Franço e de Prouvenço
D'uno alianço senso fin
Si soun douna la libro anello
E de sa beouta vierginello
Van flouri lou meme jardin.
En voueste ounour, novi, nouvieto,
Cado flour alestis inquieto
Soun viesti lou mai agradieou;
Au fresc printems de la naturo
Per vaoutre art, scienci, letraduro
Mesclon soun printems renadieou.
Vène à la noueço enfestoulido,
Vène, ma reino tant poulido,
Apouarto toun present nouviaou;
Manco uno perlo à la courouno,
Toun couar: leou, leou, Marsiho,douno
Toun tresor eis espous reiaou!
Ti dounes tant ben quand ti dounes,
Mé tant de voio t'abandounes
Quouro l'amour ti va pressant
Que tout-d'un-temp dins la soufranço
Espantes e saouves la Franço
Emé lou plus pur de toun sang!
A vous moun inne e moun cantico,
Erouïno de raço antico,
Que sus lei barri senso poou,
Coumo de liouno en bataio,
Afrountant assaout e mitraio,
A la mouart vous lanças cent coou!