LEI TROUBAIRE MARSIHÉS Obro deis Encian, un Eissame de ...

J. -B. Faure.
L. P.
A semoundre ma noto à n-un councert tant beou!
— Pantaihaire mi dien; li respouendi: — Poeto!
Alor brànlon la testo e pàsson... Toujou vaou!
Pu charmant cade jou moun plesi si repeto,
Moun camin es pu beou e mi mèno plu n-aout.
Sàbi qu'arribarai aou tremount senso arbiho,
Mai faou tort en degun: eimi, cànti, sieou gai;
E quand aourai proun vist eici tei mereviho,
Moun Dieou, amount mè tu reprendrai moun pantai!
EI PEIRO-PLATO
Aou mes de jun de l'an passa,
Feli, l'enfant d'Arlaoud, de San-Jirome,
Aqueou blound que moussu Galimber a plaça
Enco doou perruquié de la Plaço deis Ome
Mount' acoumenço lou mestié,
Un dilun, lou jou que sourtié,
Ei Peiro-Plato, em'un coulego
Aneron si bagna. Tout lou mounde saoup ben
Qu'ei Peiro-Plato, un bein couesto pa ren;
Mai qu si bagno, si li nego.
Feli, su d'aqueou poueint, mi countrestarié pa.
Tout beou just s'ero mes à l'aigo que, pecaire,
Su la roco resquiho e que toumbo de caire
Dins un traou: sieguè leou per uno erso aclapa.
D'en terro lou mounde creidavo.
Va ben que soun ami, que coumo un pei nedavo,
En tres palado ven su d'eou,
Plounjo, l'aganto per lei peou.
E, davant la fogo ravido,
Su la ribo l'aduè quasimen senso vido.
Lei frumo lou cresien deja passa per uei
Quouro Feli, duerbent leis uei,
Entre-mitan d'uno racado,
Dis aquesto martegalado:
— A l'aveni, serai plu tant fada,
Mi bagnarai plu ges que noun sachi neda!...