LEI TROUBAIRE MARSIHÉS Obro deis Encian, un Eissame de ...

ESPERANÇO!
Lou couar de doou maca, l'aouriho pleno encaro
Dei brut de sang, de guerro e de mouart deis uman,
Disieou descounsoula: La vido es troou amaro
Vuei su terro, e, bessai, sera piegi deman!…
Trevàvi, pensatieou, dins lou libre campestre,
Perdu dins un pantai e repetant toujou:
Vuei!... deman!... l'aveni! qu saoup ce que va r-estre
Per ieou?... E s'ero, vuei, lou darniè de mei jou?...
Pamens, su moun camin, su lou front dei campagno
L'aoutouno espandissié soun diademo d'or,
E deis aoubre bagna d'uno proumiero eigagno
Pendien dei frueit madu leis ooudourous tresor.
Tout ero, à moun entour, pas, joio, benuranço,
E sentieou paou à paou ma lagno s'esvali
Enterin qu'à moun couar reneissié l'esperanço,
E qu’uno vouas, dins ieou, cantavo à jour fali:
Oh! perquè deja s'abandouno
Toun amo à l'amarun dei plour?
Ami, sian encaro à l'aoutouno,
Perquè desespera: resto encaro de flour!
Se luen d’eici la dindouletto
Fugis jusqu’aou printen nouveou.
As la bouscarlo poulidetto;
Perquè desespera: resto encaro d'aouceou!
Regardo lei champ e lei prado
De verd e de jaoune pinta;
Es lou moumen que tout agrado;
Perquè desespera: resto enca de beouta!
Souto l'ooume aou toumbant fueihàgi
Fiho e jouvent, l'uei en flamour,
An pa cessa soun calignàgi;
Perquè desespera: resto encaro d'amour!
Se la terro aou matin de neblo s'enmantello,
Lou souleou à miejou li mando un rai pu vieou
E pu claro, la nuè, amount luse l'estello;
Perquè desespera: resto enca lou bouen Dieou!