LEI TROUBAIRE MARSIHÉS Obro deis Encian, un Eissame de ...

J.-B. Faure.
NOUESTO-DAMO DE LA GARDI
Quihado su la roco, en faço la mar bluro,
Mountè, grand vo pichoun, vògon milo bateou,
La basilico-fort si dreisso fiero e puro,
Coumo, à l'Agi mejan, lei bàrri d'un casteou.
Su sa tourre, amoundaout, doouminant la mountagno,
La Vièrgi 'mè l'Enfant, dins soun long vièsti d'or,
De sei bras espandi benisson la campagno
E la vilo e la mar que s'enlaçon aou bord...
Su sa testo aouturouè, de neblo enmantellado,
Coumo per uno reino aou mitan de sa cour,
Lou dardaihant souleou e la vouto estelado
Estèndon en tout remp soun pàli d'esplendour.
Per sa verdo centuro, a la couelo ountè canto,
L'estieou, su lei grand pin, la cigalo e l'aouceou;
Puei, à l'entour, la mar eis erso caressanto,
Mountè lou gabian juego à l'entour dei veisseou...
Adabas, à sei ped, s'estalouiro Marsiho,
La vilo doou coumerço e doou noble travai,
Dei jouven valurous e dei poulidei fiho
Qu'an lou couar plen d'amour e l'uei plen de pantai.
De lun, lei matalot, l'iver, quand lou vent sibIo,
Counfiant, vers la tourre entrevisto à l'ueiaou,
Si viron, e subran la brefounié terriblo
Toumbo, e l'Estello amount luse, divin fanaou.
E coumo tres salud que vers la Boueno-Mero
Màndon lei Marsihès quand dindo lou bourdoun,
D'avaou tres coou per jou s'elevo uno priero:
Lou matin, à miejour e lou sero aou tremount.