LEI TROUBAIRE MARSIHÉS Obro deis Encian, un Eissame de ...

J.-B. Faure.
LEI MOUART
Quand s'es roumpu lou fieou qu'eici leis estacavo
A la vido, à l'amour de tant de couar maca,
Tranquile soun ana mountè va touto cavo,
Quand ven lou temp marca.
Ero un paire, uno maire, uno fremo adourado,
Un enfant espeli coumo un proumié boutoun...
E naoutre, en curbissent sei labro desflourado
De plour e de poutoun,
Assajavian, ailas! finco à l'ouro darriero
D'aluencha l'orro Mouart qu'arribavo en courrent...
Mai Dieou aviè marca la fin de sa carriero;
E lucherian per ren!...
Sa vido s'amouessè coumo la palo flamo
D'uno lampo agoutado à l'ouro doou trelus,
E pareissien davant lou Grand Jùgi deis amo
Quand dindè l'Angelus.
Aqui, que s'es passa?... La toumbo a sei mistèri;
Soulet poou espera lou couar que crei à Dieou,
Car saoup que se lou corp s’aclapo aou cementèri,
L'esprit es toujou vieou!
Lou crestian penso ei sieou, davanço per sa testo
L'ouro de la courouno, en esperant lou jou
Que lei retrobara dins l'eternello festo,
Mountè s'eimon toujou!
LA RESERVO D'ENDOUME
A Moussu A.-F. Marion.
Crescite et multiplicamini.
Pa countent de bandi de nouesto paouro tèrro
L'aouceloun qu’en l'ornant tamben la defendiè,
L'ome, senso resoun, su mar fasiè la guerro
Aou peisset qu'aou foun s'escoundiè...