LEI TROUBAIRE MARSIHÉS Obro deis Encian, un Eissame de ...

J.-B. Faure.
Ben leou, ô moun eimado Franço
Su toun espaso ai l'esperanço
Que de beou noum s'escrieouran mai!
LA GAMELLO
A Madameisello ***
Rias ben fouart, que? quand vias passa dins lou vilagi
Lou sordat tout pooussous que, per faire un loung viagi.
Pouerto sa gamello en camin
E plan-planet siblo un refrin.
— Ah! se vesias, madameisello,
Ço que l'a dins nouesto gamello,
De segur n'en ririas pa'nsin!
Ero en l'an de malur milo-iué-cent-setanto,
Ei moubilo de Louaro un jou ven un bretoun,
Tant courajous que ren l'espanto,
Mai simplas coumo un enfantoun.
— Va creirias pa, madameisello,
Que voulié manda sa gamello,
A sa maire emè sei poutoun!
— Quand couesto uno gamello? E lei bouen cambarado,
Leou per si trufa d'eou, li dien: — Ben estamado,
Moun pichoun blu, couesto des franc!
E l'enfant palissè subran...
— Ero paoure, madameisello,
E trouvavo de la gamello,
Per soun boussoun, lou pres troou grand.
Alor sei coumpagnoun li fuguèron: — Escouto,
Deman mè lei Prussian si batren eilalin;
Per cado macaduro, bouto,
Ti dounan des soou toutei vint!
— Va, nous diguè, madameisello;
Toucas aqui que la gamello,
Si gagnara deman matin.