LEI TROUBAIRE MARSIHÉS Obro deis Encian, un Eissame de ...

J.-B. Faure.
LEI TRES COULOUR
Sounet-Acrousticho
Beou pavaihoun francès, tu qu'aduès l'industrio,
Lou coumerço e la pas, servi per ta valour,
En tu vieou un mouceou sacra de la Patrio,
Un pan doou ciele blu pinta su tei coulour.
Ben aout floutes toujou, mume couro vario
La fortuno, ei moumen d'esprovo e de doulour;
A l'ouro doou dangié ta blanco flamo briho,
Nous guidant fieramen aou camin de l'ounour:
Car, souvent, en de jou de doou e de soufranço,
Rouge t'a fa lou sang deis enfant de la Franço,
Ooufri senso reservo en faço de la mouart.
Urous e fier drapeou, doou passa remembranço,
Gàgi de l'aveni tout flouri d'esperanço,
Eimi tei tres coulour, gravado dins moun couar.
Franc doou temp, pa ben long, que fasieou moun servici
A Nime, dins l’artiharié,
Ai iamai fa parla la poudro, car ahissi,
Dei cassaire de v-uei lei sanglàntei malici
E l’inutilo barbarié.
Tamben leis aouceloun, anas, s'esfraion gaire
Quand mi vien passa dins lei champ;
Mi sàbon soun ami, leis inoucent cantaire,
E per mi gramacia vènon souvent, pecaire,
M’ooufri l'ooumàgi de soun chant.
Ooudoun, l'aoutre matin, èri dins un bouscàgi
En trin de pantaia d'amour,
Quand de la bando alado aousèri lou ramàgi,
E, coumo sieou poèto, ai coumprès soun lingàgi,
Qu'anas entendre à voueste tour.