LEI TROUBAIRE MARSIHÉS Obro deis Encian, un Eissame de ...

Car toùtei, segu, s'estimàvon
Lei pu digno d'amiracien.
Ooudoun, un matin s'asardèron
E, crentousamen, li diguèron:
— Signouret, vous que sias pu beou
Que tout ço que luse aou souleou,
Vous que tant de siecle esperèron,
Vous qu'adoùron leis angeloun,
Vous, Jèsu, qu'aou ciele, eilamount,
Avès samena tant d'estello,
Vous qu'avès fa la flour tant bello,
Lou parpaihoun tant fouligaou,
L'aouceou que, su la branco, adaout,
Dis sa cansoun toujou nouvello,
Choousissès la pu bello flour,
Quelo que lou miès vous agrado,
Mè soun prefum vo sei coulour,
Per que siegue, en present d'ounour,
A vouesto maire counsacrado!
E caduno à l'enfant divin
Disié sa beouta, sa verduro
E lei coulour que la Naturo
La vestissié cade matin.
— Ieou, sieou roujo, fasié la roso,
Coumo lei flamo de l'amour,
Sieou la flour que lou sang arroso,
Flour doou couar: — Prenès-mi, Signour.
— Siès bello, mai l'a troou d'espino
Su tei branqueto, dis l'enfant,
E la ben eimado divino
Dueou pa r-estre uno flour de sang.
— Ieou, reprenguè la gira-solo,
Sieou l'amigueto doou souleou,
A sei rai viri ma courolo,
Bel enfantoun, prenès-mi leou.
— Nàni, siès la flour de l'empèri,
E, su terro, à toun or prefèri
Lei coulour de la paoureta.
— Sieou la flour de l'umilita,
Li fa la vieouleto emè crento,
De la glòri mi tèni lun,
Jiti d'escoundoun moun prefum;
D'estre à vous serieou tant countento!…
— O tu, t'eimi, pichouno, vai!