LEI TROUBAIRE MARSIHÉS Obro deis Encian, un Eissame de ...

Pamen à l'ome venian dire:
— Ami, veici mai lou beou temp;
La naturo va mai ti rire,
Sian lei messagié doou printemp!...
— Ieou, digué la cardalineto,
M'un tramblun d'esfrai dins la vouas,
Quouro, aou matin, touto fresqueto,
Eis ecò tranquile doou bouas.
Per saluda l'aoubo nouvello
Que luse su lei champ desert,
Jiti ma noto simplo e bello
Que mounto à Dieou dedins leis er,
L'ome, lou rei de la naturo,
Que sortè de la man de Dieou
La pu bello dei creaturo,
A n-un councert tant agradieou
En plaço d'uni sa vouas, s'armo
Per faire — es lou dret doou pu fouart —
De la mieouno teisa lou charmo
Doou grand silenci de la mouart...
— E ieou, d'uno vouas esmougudo
Li respoundé lou roussignoou,
Ieou que canti la benvengudo
A la Nuè quand, de soun lançoou
Tout argenta de rai de luno
E diapra d'estello d'or,
Agouloupo la lando bruno,
L'ome ven troubla meis accord...
Entrecoupo ma meloudio
Mè soun tounerro maoufasent,
E fa cessa la pouesio
De moun bouscagi tant risent!
— Leis ingrat que nous fan la guerro,
Disié lou quinsoun, plu tant gai,
Ooublidon troou leou que la terro
Senso naoutri, per soun travai,
Li rendrié maigro recoumpenso,
Car lei besti manjarien tout,
E qu'emè touto sei despenso
Pourrien pa jougne lei dous bout!...
— Aoumen se sabien la tristesso,
Apoundé lou pichoun rigaou,