LEI TROUBAIRE MARSIHÉS Obro deis Encian, un Eissame de ...

Lou Troubaire de Sant-Jan.
Lou Centenari doou Groulié Bel-Esprit
A Louis Pelabon, pichoun-fieou de l'aoutour de Maniclo.
Per lou centenari proumié
Doou Groulié Bel-Esprit, ooubrèto qu’en Prouvenço
Es la mai espandido entre lei devancié
De nouesto reneissenço,
Avès dins de vers esmougu
Canta doou reire-grand la pèço trioumfalo
E celebra soun noum, coumo l'èro degu,
En lingo prouvençalo.
Tamben, naoutrei vous aclaman,
Que sian lei decendent dei galoi rimejaire
E dins l'encantadisso atout pican dei man
A l'obro doou troubaire.
Or, veici ço que si sian dit:
En celebrant tamben aqueou beou centenari,
Aou gai e flame aoutour doou Groulié Bel-Esprit
La glori poupulari.
Mai vous que doou reire valent
Avès, ô Pelabon, mantengu la memori,
Aguent soun gaoubi fin, sa voio e soun talent,
Partajarès sa glori!
Lei Poulet e lou Jugi de Pas
Mounté cadun l'agrado pleideja,
Parei, es à... Pamparigousto!
Taou a perdu que si voou revinja
E dei proucès degun n'es à la sousto.
Un jour dous bastidan, per de petoun peté,
Si fan veni din lou pretori
E lou pu poulid de l'istori
N’en es eiço, que moun grand mi counté.
De bouon matin, lou jour que la bihetto
Duvié lei metre nas à nas,
Un dei dous bastidan tiro la campanetto
De l'oustaou doou jugi de Pas
Emé uno paniero à soun bras.