LEI TROUBAIRE MARSIHÉS Obro deis Encian, un Eissame de ...

Lou Carpouraou.
E sian segu qu’aqueou que sera soun espous
Va regretera pa. Seran d'acord touei dous.
Pamens lou principaou sera d'agrada'ou paire:
Vous foou per reüssi lou prendre doou bouen caire,
Car maougra qu'ague l'er d'estre un bouen pataras,
Diren senso menti qu’es un gros avaras.
Eou, si privo de tout, es un esquicho-anchoio,
Voou espragna su tout, pastarié mè de croio.
Tout ce que mi disien, mi fasié pa grand gaou.
Puei, à la reflecien: — Tout acò m'es egaou,
Mi pensèri: — Siguen d'accord mè la pichouno,
E mi gàrci doou viei; se su la dot chichouno
Ebè! m'en passarai. Vieouren ben senço acò,
En travaihant touei dous rampliren lou cocò.
Quand si counvenguerian emè la dameisello,
M'en anèri trouva lou paire de la bello,
En qu faguèri part aou long de mei proujet,
Li countèri moun cas, faguèri moun buget.
Aquest mi respoundè: — Vous acepti per gendre,
Per miès parla d'acò, revenès mai divendre.
Arribas per dina se poou vous fa plesi.
Anas, tout marchara selon vouèstei desi.
Lou couar countent, l'esprit rampli de ma ninoio,
Lou divendre à miejou venguèri plen de joio.
Dessueito s'entaoulan, mi tenieou coumo foou.
Portèroun lou dina. Qu'avien mès? De faioou.
Ieou, m’agràdoun tout plen, lei faioou en salado,
Mai mi li foou dedins uno cebo coupado.
Su taoulo n'avié ges. Mi dieou: V'an ooublida.
— Beou pèro, que li dieou, d'un er tout decida,
Aourias pa per asard uno cebo dei blanco?
Ai pa puleou di cò, que de manja s'atanco,
Si dreisso coumo un fouel, si pico dins lei man,
E, si virant vers ieou, mi creido:— Que grouman!
Mai que vous foou? N'avès pa proun de la bajano?...
Manjarias dins un jou l'avè d'uno semano!
Emè de goust parié, portas pu luen lei pas,
Acabarias moun ben dins un soulet repas.
Ma fiho, à toun futur, pouèdes faire la bèbo.
Moussu, mè de faioou, li foou enca de cèbo!…