LEI TROUBAIRE MARSIHÉS Obro deis Encian, un Eissame de ...

Lou Carpouraou.
Toùti lei direitour soun d'ome redouta,
L'anavo pa troou gai, mai, en eou, si pensavo:
Bessai l'agradarai; qu saoup? Se mi plaçavo!
Coumo serieou countent de canta l'opera;
Ah vai, moun bouen Marteou, foou pa desespera.
De couràgi! qu'as poou? Vai-li de ta partido,
Qu'assajo ren a ren, quand foou gagna la vido.
Intrè doun aou bureou de moussu Halanzié,
En qu si presenté coumo un flame goousié.
Lou direitour fougué charma de soun fisico,
Puei, lou fagué canta. Marteou, senso musico,
Si mete alor en trin, e, dins un vira d’uei,
De mouceou d’opera n'en canto tant e puei.
Que tenor, mei ami! Que coou de gargamello,
D'ountè sortien lei si, leis ut per ribambello!
A vous faire creba d'envejo de cresta!
Canto que cantaras! Poudié plu s'arresta;
Acabavo un mouceou, un aoutre n'en cantavo.
Lou direitour qu'emé patienço l'escoutavo,
A la fin puei, pamens, li poudent plu teni,
Li coupè lou siblet subran per n'en feni,
En li diant:— Gramaci, voou mounta l'Afriquèno,
E vous crèsi proun fouart per pareisse su sèno;
Mai lei role estent pres, es que, moussu Marteou,
Voudrias juga la mar à l'ate doou bateou?...
E Marteou s'en anè capot, la mouart dins l'amo...
Despuei li parlas plu de canta — mai declamo.
PER UNO CEBO
Declamacien
L'a quaouque temp d'acò, mi voulieou marida,
De prendre uno mouiet èri ben decida.
Siguèri presenta dedins uno famiho
Mountè poudieou choousi, car l'avié quatre fiho.
L'einèio, vous dirai, m'agradavo pa maou,
Lei vesin n'en disien foueço ben dins l'oustaou.
La pichouno, fasien, es foueço inteligento;
A'n caratèro d'or; la vias toujou countento;