LEI TROUBAIRE MARSIHÉS Obro deis Encian, un Eissame de ...

Victor Bénac.
A PLANIÉ
Dedicado ei Parisien.
Senso mistraou, ni brefounié,
Aven jita l'ancro à Planié
Que su la mar dins la nué briho
E gardo lou port de Marsiho.
Soun grand uei dubert aou grand larg.
Semblo un ciclofo de la mar!…
Aqui, vivo lou bouihabaisso,
Lou pei de roco, la rascasso,
La girèlo emé lou fiela,
Que de pei per si regala!
Lingousto, booudroi e sardino,
Nous n'en fes lipa lei babino,
E nous fes dire, quand brafan,
A taoulo: Mouère qu'a pa fam!
Vivo aoussi, vivo la bourrido!
O Dieou, que chale d'estre en vido!
Mai la bourrido, meis amis,
Si manjo, mume en paradis!
Aqui, lei trancho safranado,
Trempado d'aiet, ben pebrado,
An fa manda lei cambo en l'er,
A Venus, em'à Jupiter!
Venus, à la caro enflourado
Tenié lou mortie su la faoudo,
E davant d'elo Cupidoun
Li fasié passa lou treissoun;
Jupiter, eou, si delegavo
De vejre l'oli que rajavo,
E dins sa man, coumo un bouquet,
Portavo uno testo d'aiet!...
Marsihès, aou mitan dei festo,
Que degun li perde la testo,
Sieguen fier de noueste peïs,
Marsiho es l'amo de Paris!
Marsiho es uno beneranço,
Per fa bouihi sian lei flambard,
Se Paris es Rei de la Franço,
Marsiho es Reino de la mar!
E davant lou roucas que briho,
Marsihès, buguen à Marsiho!