LEI TROUBAIRE MARSIHÉS Obro deis Encian, un Eissame de ...

X...
UN OREMUS PER SANTO-MADALÈNO
De Gargantua l'aoutour èro esta medecin
E que sabié ben soun latin!
Avié juega ben d'aoutrei persounagi,
Va sabès touei, n'èro pa dei pu sagi.
A la fin devengué cura;
Eimavo fouesso à questiouna.
Uno fiho de sa parouasso
Secretamen èro estado en engouasso.
Avié soufri, va dirai roundamen,
Lei doulour de l'enfantamen.
Or, aquesto si maridavo.
Lou cura que voulié saoupre aou segu la cavo,
La prenguet en despart. — Escouto, Margoutoun,
Ti va dirai senso façoun,
N'es pa per que dounes un ciergi.
Quinto messo diren? Sera-ti de la Viergi
Vo ben d'aquello pecadoué
Dins l'Avangilo tant laousado,
Coumunamen Madalèno apelado?
Pren gardo, seriès maluroué,
Toun ome ti batrié, va ti dieou pa per rire!
— Vieou, moussu lou cura, ço que voulès dire,
Digas de la mèro de Dieou,
Ana, va prèni tout su ieou. ”
Rabelais si viestis, pren la chasublo blanco.
En anant à l'aouta, passo davant la banco
Mounté Margoutoun à ginous
Aou cura fent l'uei dous,
Daise, li fa: — Vè, mi vias touto en pèno,
Digas un Oremus per Santo-Madalèno!
*