LEI TROUBAIRE MARSIHÉS Obro deis Encian, un Eissame de ...

PAJO ESTRAIADO
LEIS ANGUIELO
Dessu lou bord d'uno riviero,
Un marquis aviè soun casteou,
E mai que d'uno fes, à l'aoubo matiniéro,
Ero urous de pesca, quand lou temp èro beou,
Adoun un jour qu'avié fa boueno pesco,
Que d'anguielo tout plen s'èron presso à seis esco,
Souené soun domestico e li digué: — Bouen Jan,
T'en vas ana trouva subran
Lou cura de noueste vilaji,
E li faras ooumaji
Deis anguielo qu'estou matin
Ai pesca. Prend doun lou coufin,
E pouarto li, tamben, la letro cachetado
Que trouvaras su moun bureou.
Lou varlet prengué doun la letro, l'angueilado.
E parte leou
Eme soun gorbin su l'esquino;
E tout en fasent boueno mino,
Talamen èro countent
Qu'à l'egliso arribé dins ben gaire de temp
Mai parei que long de la routo.
Coumo la banasto èro routo,
Leis anguielo en si l'esquihant
Paouc-a-paou ficheron lou camp,
Dabord din sa malemparado
Janet douné la letro cachetado
Aou cura qu'en la liejissent
Li digué d'un er coumplesent,
Mai tout en gardan soun er grave:
— Diras à toun moussu, moun ami, qu'es ben brave
E que n'en sieou ben satisfa
Deis anguielo que ma manda. ”
Jan que dins sa banasto
Li trouvavo plu ren, pa mume uno lingasto
E que n'èro tout trebouela.
Li digué: Mai moussu mi venès de parla
Deis anguielo; mounté poudès leis avé visto?
— Per ma fisto!
Faou que siegues un beou taloun,
Toun mestre mi n'en fasent doun
Dins la letro mi n'en aviso...