LEI TROUBAIRE MARSIHÉS Obro deis Encian, un Eissame de ...

LOU NOUM DOOU PÈRO
Quand Pignoou de Casteou-Goumbert,
Agué de Titino Rambert
Soun einé, li n'arribé v-uno,
Bouta, lou jou qu'à la Coumuno
Vengué per desclara l'enfant
Que lou mounde n'en parlo encaro en s'en trufant.
E, sabes, l'a d'aco guaouquei pareou d'anado:
Vuei l'enfant es dins sa trentèno... entamenado.
D'aqueou temp lei tramvai roundejavon panca
Emé sei plaço à bouen marca,
E per decendre doou vilagi
Fouèço troou chiar èro lou viagi:
Douge soou per veni, per mounta douge soou,
Pa mai que v-uei l'argent si rabaihavo aou soou,
De fet, quouro a Pignoou li vengué de famiho,
Counoueissié pancaro Marsiho.
Mai, per lou coou, si foulié boulega.
Leis enfant neisson pa coumo s'èro de gat,
Faou que, davant moussu lou mèro,
Emé sei douei temoueîn, lou pèro
Vague desclara lou nistoun
E douna sei noum e prenoum.
Per uno bello matinado,
Pignoou, emé sei cambarado,
Alisca, pimparra, courous,
Escalon l'onibus, n'en decendon aou Cous
E coumo se toumbavon de la luno,
Arribon davant la coumuno
Per la Canabièro e lou Port.
Su la pouarto, un fourrié, qu'emé soun galoun d'or
D'aou mens tres det su la casquèto
E sei boutoun lusent su la jaquèto,
A Pignoou li fagué l'efet
De r-estre moussu lou prafet,
Li moustré l'endret dei neissenço.
Aprè pa maou de reverenço,
Intron dins lou bureou e coumo de fada
S'atancon davant d'un cleda
Mount'en esperant la pratico
Un empluega ligié la poulitico.
Tant lei leissavo aqui dret finqu'aou lendeman,
Se Pignoou, mé respet, lou capeou à la man,
L'avié pa counta soun afaire.