LEI TROUBAIRE MARSIHÉS Obro deis Encian, un Eissame de ...

M. P.
RIMO SARTANIERO
LEI DOUS AVUGLE
Davant l'egliso (Eiço n'èro per Pasco)
Mei dous avugle aparavoun la man.
Faou manja vuei e faou manja deman:
La misero es uno tarasco
E qu si juego d'elo amerito de coou!
Ensin n'en siguè d'aqueou coou.
Tout lou mounde sourtiè, la messo èro fenido
E s'atrovo un marri crestian, un senso couar,
Que dis ensin e dis proun fouart
Eis avugle qu'an boueno cousido:
— Vaquit vint soou, vous farès de mita... ”
Lou marrias leis a fa pita:
A sa paraoulo a pa jougnu la pèço!
E lou crestian de talo espèço
S'aluncho un paou per escouta.
Cade avugle, que talounado!
Ben countent si sounjo en despart;
— Es à l'aoutre que l'a dounado.
Toutaro n'en aourai ma part ”
Mai ven lou moumen doou partagi,
Marri moumen, mume per l'ome sagi!...
E la pèço, mounte es?
— Es tu que l'as, dis l'un.
— Anen, vai galeja pu lun,
Dis l’aoutre, es tu que l'as reçudo...
— Noun! noun! l'aouras troou rejougnudo,
Vo ben la voues garda?…
— Teiso-ti, viei couquin!
Aco si passara pa'nsin,
Mi voues voula!
Siguè ben tal oouvari,
Que, per la pèço imaginari,
Lei dous avugle, bouen vesin,
Si bateroun coumo dous chin!
Lei pople, qu'es d'avugle, an lou mume destin:
Ben souvent lei grand de la terro
Li proumetoun la Pas e samenoun la guerro!
E lei nacien, qu'an afusca,
Si batoun coumo chin e gat!