LEI TROUBAIRE MARSIHÉS Obro deis Encian, un Eissame de ...

LOU SOUPA DEI MOUNJO
L'a quaouqueis an d'acot, pa ben luen de la vilo,
Aou dessu d'un oustaou d'aparenci tranquilo,
Si visié lou clouchié d'uno coumuneouta
Mounté reinavo l'ordre emé la carita.
Lei mounjetto èrount ben dins aquello demouèro
E desiravoun pa de s'en ana defouèro,
Car aou mounde avien dich un eternel adieou,
Sarvissent dignamen lei paoure e lou bouen Dieou.
Erount douge, pa mai, coumprès la superiouso,
Uno frumo aou couar d'or, pa fadado e piouso,
Que sabié tout soumetre à soun aoutourita
Per sa boueno façoun e seis er de bounta.
Avié regla lou temp de blago e de silenci,
Tenié la man ei festo em'ei jou d'astinenci,
De sorto que lei sur n'avien d'aoutrei souci
Qu'à faire sa besougno e dire gramaci.
Que fuguesse aprè vespre o ben aprè la messo,
Avien qu'à s'asseta, trouvavoun taoulo messo,
E, pouedi v'afourti, mancavo pa fricot.
Mai s'atrovo qu'un jou, leissa-mi dire acot,
Un jou mounté cadun sabié que d'ourdinari
Curavoun finco aou found lei cantoun de l'oustaou,
La mèro, per malur, presso de malaoutié,
Countro sa voulounta dugué si metre aou lié;
Si sentié maou de couar e puei un gros malestre.
Dins la coumuneouta, jujas quint escaoufestre!
Lei mounjo èrount perdudo e fasien que ploura,
Li fougué tout lou jou per lei rassegura.
Gounflo coumo un perus, mume la farmacièno
Si rapelavo plu mount’èro la verveno;
La pu joueino doou cur tres fes li prengué maou.
Lou couvent aqueou jou semblavo un espitaou.
De dina n'agué ges, car lou ruscle mancavo,
Mai, lou sèro vengu, lou ventre gargouiavo;
E de paiho o de fen foulié l'acountenta.
La malaouto èro miès, foulié plu s'enquieta.
Soulamen l'avié ren de cué dins la cousino,
Senoun, dins un viei plat, douge vieihei sardino
Fregido de la veiho e qu'avien resta'quit.
Ero un pichoun soupa per tant gros apetit.
E, dins tres coou de dent, l'afaire fougué lesto.
Veici qu'aou found doou plat, n'agué v-uno de resto,