LEI TROUBAIRE MARSIHÉS Obro deis Encian, un Eissame de ...

Louis Pélabon.
LEI DOUES SOURDO
— Fremo, diga-m'en paou, sias pa de La Valetto?
— Madamo, vendi d'uou. — Counoueissès pa Paouletto,
Que demouero en intrant... la fiho doou fatour?
— Lei trouvas pa proun gros, que vous dirai, m'amour?
— Li farès de salu de la part de Saoureno.
— Va vous repeti mai: Quinze soou la dougeno.
— Saourra de qu parlas e li fara plesi.
— Se n'en voulès que siei, prenès senso choousi.
— Fè-mi la coumessien, serès tout plen poulido.
— Ai pa jes d'uou de cent, sount touti d'en bastido!
— Per saoupre ce qu'a dit, deman si reveiren.
— Lei pouedi pa leissa, courrès, enana-v'en!
E Saoureno, dirai, countento coumo un angi
De soun rescontre urous aoutant que de l'eschangi
Dei mot precipita que venien d'avé lué.
Parté. Quand l'aoutro aquito, roujo coumo lou fué
D'entendre mespresa sa bello marchandiso,
Li cantavo en plen er soun iro de soutiso.
Car, se restesse mai, dins un cas coumo aqueou,
N'en serien arribado à s'aganta lou peou.
L'OBRO DEIS ENCIAN
LA CLICO À MANDRIN
Qu'un lanço fué de Dieou mi crebe la bedeno
Se mi vien mai veni per vous douna l'estreno!
Cercarai tant e tant e cercarai tant ben,
Que bessai quoouque jour mi voularan plu ren.
Oh! vè, que vous dirai, l'a de que, su la terro,
Mouri cinquanto coou. Foudriè pa qu'un tounerro
Faguesse chavira la barco doou malur!
Lei marchand d'ooujourd'uei sount touti de voulur!
Mai d’un din lou cafè li moulino de sese...
Su d'un sac de faioou l'a la mita de pese;
L'oli, que fouesso gen van croumpa per nouveou,
Es d'oli fabrica tout prochi Sant-Maceou.
Ben leou lei boulangié nous pastaran de croio