LEI TROUBAIRE MARSIHÉS Obro deis Encian, un Eissame de ...

D'aquelei manjarié n'en finirieou jamai.
Vaqui lou tour deis ortoulaio,
Deis aloueto emé dei caio,
Lèbre, lebras e pardigaou
Que renqu'en lei viant vous fan gaou.
Touti lei capouchin si lipon lei babino,
Refrescon lou goussié m'uno liquour divino,
E coumo arribo lou desser,
Mai que d'un a lou mourre verd.
Tamben, aqui meten la barro,
Anan souto lei pin seca nouesto ganarro,
En benesissent lou bouon Dieou
De nous manteni toujour vieou
Faguès pa d'uei coumo de bocho;
Trouvas qu'ensin sian en bambocho?
E ben cridarias pa tant fouart,
Se vous foulié spera lou souar,
Coumo fen, bravei cambarado;
Pecaire, jusqu'à la soupado,
Perdries ta testo à l'estachin.
Qu'as plu ren, paoure capouchin.
Dins acò, coumo aven canta vespro e coumplio,
Anan chabi quaouquei boutiho,
Per mai prepara l'apeti,
E quand ven l'ouro doou rousti,
Aprè leis ouresoun santo e jaculatori,
Decenden mai aou refetori,
Si li restaoura l'estouma
Que coumenço d'èstre afama
Lou fraire cousinié si tiro ben d'afaire
E, boutas, saoup nous satisfaire;
Per fa vira la brocho es à-n-eou lou poumpoun
Tamben, passo pa'n jour, si gavan de capoun;
Lou jus, de tout cousta, nous souarte de la bouco
Chiman entanterin de liquour de la souco,
E redoublan lei chicouloun
Quand pareisson leis aouceloun
Emé lei platet de salado...
Jour de Dieou! quintei regalado!
Es à n'en creba de plesi.
Si gavan e buven coumo es noueste desi,
E per fini nouesto boumbanço
Entaman uno controdanso,
Jusqu'à ço que roumpu, susarent, embreiga,
Si sieguen toutis empega...