LEI TROUBAIRE MARSIHÉS Obro deis Encian, un Eissame de ...

Banaru que noun sai, nous arribo per cuou.
Es à qu passara: qu bramo, qu tempesto.
Un troupeou de mooutoun ven aoumenta la fèsto.
Touti lei carretié, destelant aou pu leou,
Per ajuda leis aoutre, acaboun l'estampeou.
E de milo badaoud la fogo rampelado
Si demando em'esfrai se l'a lei barricado.
De tout caire s'aousis que cris, que juramen;
Aourié bello trouna que si l'entendrié ren.
Ieou que, prochi d'Arenc, ai coumessien pressado
E que vieou, soucitous, doou sèro l'arribado
Sachent plu de que bouès à la fin faire fué
E gaire desirous de rintra 'mé la nué,
M'escàpi coumo un lamp, courrent pertout bourrido,
Vint coou dins lou dangié pensant perdre la vido.
M'estent perdu cent coou, viri d'eici, d'eila
Maca, tout susarent, chaouchant dins lei vala.
De la Meisoun Barret, rescountrant lei carretto,
Em' èlei mi coumpàgni aou prefum dei tinetto.
Un virocipedisto, anant d'un trin d'infer,
Aou mitan d'un fangas mi mando, cambo en l'er.
Mi redreissi e, crentous de mi veire, pecaire,
Dei soulié finco eis uei pu brut qu’un estrassaire,
Ooujant plu mi moustra, m’escoundi en un cantoun,
Maoudissent, en renant, moun fouçat de guignoun
Enterin qu'afura, mi netègi la vesto
Subran la pluèio à broou davalo su ma testo.
L'on dirié que lei nieou crebant de tout cousta,
D'un delùgi nouveou vouèloun nous fa tasta.
Per Dassa la carrièro un mouceou de bordàgi
Poousa de tout soun long, fourmoun estré passàgi.
Lei gen lei pu segu li pàssoun qu'en tremblant;
De vouié travessa vint fes faou lou semblant.
Arrisqui lou paquet. Davalant dei gorguièro,
L'aigo, dei carreiroou n'a fa 'no vrai ribièro.
Travessi en mi signant, e, maougra l'embarras,
L'aprouchi de la nué mi fa doubla lou pas.
Car dins èstei quartié, raro, sourno e pu terno
Que de calen vougnous, tout just quaouquei lanterno
Bórdoun d'afrous camin pupla de maoufatan
A l'espèro dei gen, lou couteou à la man,
Que de cade cantoun pu negre que la sujo,
A dous pas deis Alèio, n'en fan lou boues de Cujo.
Malurous lou mesquin, si rescampant de nué,
Que, per si retira travesso aquèstei lué.
Benleou quatre marrias, lou couar plen de magagno,