LEI TROUBAIRE MARSIHÉS Obro deis Encian, un Eissame de ...

P. F. Guitton.
Vis soun moussu, ris enca mat:
Creirias d'entendre brama 'n ai.
— Que tron t'esgaio de la sorto,
Que lei pichoun ti fan l'escorto?
— Ai mes lou bouen, moussu Garcin,
Mai, en intrant, n'a quatre o cinq
Que m'an fa: Jan, per qu si voto?
Mi sieou di: Lei faou couihouna...
Vaqui lou bouen, n'avieou pres noto
E lei marri lei l'ai douna!
LOU PAOURE CAPOUCHIN
Un paoure capouchin, bouon Jan gounflo-la-balo,
Emé sa biaço su l'espalo,
Anavo pèr carriero en demandant ei gènt,
Aou noun de Jèsu-Cri, de pitanço e d'argènt.
Noueste brave pito-dardèno
Si fasié remarca'mé sa grosso bedèno
E soun nas espoouti rouge coumo un pebroun.
Ensin, pensas bèn, n'avié proun
Pèr fa rire lei boueno-voio;
Ero uno partido de joio,
Quand, su lou quèi, lei portafai
Visien lou fraire Bounifai.
— Oou l'ami! — li fasien. — Coumo va la cougourdo?
A ce que parei, lou bouon vin
Lou trouvas enca pu divin,
Coulègo, que l'aigo de Lourdo.
D'abord, en fènt l'oouriho sourdo,
Lou fraire caminavo emé leis uei aou soou,
Vo bèn quistavo quaouquei soou
De la man dei gènt caritable.
— E bèn, sant ome venerable,
Fasien mai lei garobouontemp,
Parei, perdés pa voueste temp
Pèr vous gooudifla la ventresco.
O que nas, tron de l'èr! e quinto facho fresco!