LEI TROUBAIRE MARSIHÉS Obro deis Encian, un Eissame de ...

Lou Faroun.
Ah! bourreou de temp! vouei, l'amo la pu duro
Aourié pa mes defouèro un mouestre de naturo,
Un pestiferat, un judieou,
Lou pu traite animaou toumba dei man de Dieou!
En saoutant lei trotouar coum'uno coouquihado,
Emé lei braio retroussado,
Sabato ei man, à ped descaou,
Mi recampavi à moun oustaou
Quand viguèri'no joueino fiho
Dins l'aigo finqu’à la caviho
E de bouteou tant ben moula
Que m'aplantèri estupefa.
Un poulissoun de vent, per acoumpli la festo,
Metié sei rooubo su sa testo:
— O tresor, li diguèri, un paou dins l'embarras,
Vous saoucès plu, prenès moun bras,
Grasset es bouen enfant, ni mouarde, ni grafino,
A puei pa troou marrido mino.
Anen leou s'estrema, si cerquen pa de maou,
E prendrès quaouca-rèn de caou.
Trempado coumo uno marlusso,
Aou cabaret de misé Luço
Vous secarès davant lou fué,
Chimarès douei det de vin cué;
Es leou passa'n moumen de crento,
Ana, v’enanarès countento.
— Nani! cridé subran, encambant lou vala —
E mi dispareissent... Restèri aqui giela.
Quand fara brefounié, tent ta barco amarrado,
Mi pensèri, capot. Qu t'aourié di, Grasset,
Qu'uno femello tant bagnada
Ti respoundrié'n Nani! tant sè!…
LEI SABOUNIÉ QUE DEMANDON UN MESTRE
Leis oubrié d'uno sabouniero
Eron urous coumo de rèi;
Senso countresto e senso lei,
Travaiavon à sa maniero,
Chincherin, mé ges de tracas,
L'un dei souci, deis escaufestre,
Souto d'un brave soubre-mestre