LEI TROUBAIRE MARSIHÉS Obro deis Encian, un Eissame de ...

Lou Faroun.
Coumpreni qu'en vesent la cliquo
Que nous espiho touti vieou,
Siegue judieou vo catouliquo,
N'ague plu counfianço qu'en Dieou;
Que lou rentié sié nouma mero,
En renounciant à soun repeau.
E l'oubrié que lou fai artero
Sié counsihé municipaou.
Coumpreni que lou journalisto
Renique encuei sa fé d'antan
E, lou nas su d'uno aoutro pisto,
Mete sa councienço à l'encan,
Qu'un capelan nous digue en chero:
Tout nous ven doou ciele à prepaou
E fes ce que vous dieou, mei frero,
Senso regarda ce que faou.
Coumpreni que, se pourtes vesto,
Ti viroun lou cuou de pertout
Car la miseri es uno pesto
Fugido d'aqueou qu'a d'atout;
Qu'alassoun sempre toun aouvido
Dei mot Ounour, Umanita,
Per que dedins aquesto vido
L'a que de bougre e d'abeta...
Mai ce que pouedi pa coumprendre,
Es de trouva d'ome abruti
Que, coumo servici à li rendre,
Devrien pendre vo ben rousti!
—Titin, ti sentes pa vargougno,
Ti bate ren souto la peou
Quouro entendes dire: Un ibrougno
Es mens qu'uno besti. Buai d'eou!
— Un coou fa pa puto, coumpaire,
Digué Titin, ben à prepaou
Lou ciele m'a manda, pecaire,
Lou remedi dins moun oustaou.
Aquelo sero, à la guingueto,
Ero la festo doou long Buou,
Ploouvié de vin viei, d'aniseto
E sourteri plen coumo un uou.
Mai quand mi coucheri emé Clero
Ma pego ero seco... Que voues?
En plaço d'uno belo-mero
Su ma pouerto n'avieou vist doues!...