LEI TROUBAIRE MARSIHÉS Obro deis Encian, un Eissame de ...

Jan de la Plano.
N'avié dija mié banestoun
Quouro subran, aou vira d'un cantoun,
Noueste brave coulego
Va quasimen pica de brego
Su moussu lou cura
Que, souto uno figuiero,
Ero tout afura
Dintre soun libre de preguiero.
— Hoou, vè, siès-tu, moun beou Janet?
Tè, semblo pa de creire
Lou gros plesi qu'ai de ti veire!
Coumo ti va? — Coumo vias: plan-planet.
Per quant à vous, mi n'en souciti gaire.
Li fa Janet, dirien un troumpetaire!
— Bor que ti vieou, asso, digo-mi'n paou,
Alor devenen d'aganaou?
Tu, ti vien plus à la messo
E ta mouiet à la counfèsso
Ven plu li descarga soun fai.
Basto, vivès parié deis ai!
— Que tron voulès? Es pa per maoucresenci
Nimai per maouvoulenci
Que trevan pa l'oustaou de Dieou.
Lou temp, soulet, n'es lou faoutieou!
L'a tant à faitre à la bastido
Que quasimen tout l'an courren bourrido.
— Dieou pa de noun. Mai sian crestian
Vo ben sian de booumian?
Ooudoun, bouto-ti din la testo
Qu'en tout l'a temp e que n'en resto.
Aro que sounjaras
Quouro uno frumo, tu saoupras,
Que de loung temp s'estent pa counfessado,
En saoumo un jou fougué sanjado?
— En saoumo, dias? Alor retardarai
De vous manda Tisteto
Que se, per cas, devenie'no saoumeto,
Urous n'en serieou que noun sai!...
*