LEI TROUBAIRE MARSIHÉS Obro deis Encian, un Eissame de ...

Coumprendrieou voueste pretencien!
— Elo, leis uei rempli de larmo,
Digué: — Lou mihou de moun amo
Si trovo aou ciel. Mei quatre enfant,
Qu'ensin que va sabes, s'eron fa capelan,
Coumo missiounari parteron;
Eilavaou ben luen s'en aneron…
Despuei n'ai plu 'ntendu parla…
Soun eicilo se soun pa 'ila!
Eici, vous, n’avès qu’un, viergi, ieou n’en ai quatre!
Es juste que senso mi battre
Resti aou sejour dei benurous!
Si servié d’un parla tant dous,
Que la Santo Viergi attendrido
Leissé la pouarto esbardanido.
La couquino enca ’n paou poussé
E soun corp entié li passé.
Lou bouen Dieou, estrui per sa mèro,
Si faché, si meté'n coulèro.
Digué: — S'es fichado de vous,
La vieio, eme soun teta-dous!
Vieou que su degun pouedi gaire
Mi fisa! Farai meis afaire,
Tout soulet! Es un tron-de-l’er
Aquesto femelo! Eis enfer
Meritarié que la mandéssi!...
Dei testardasso es raro espèci!
Se tout lou mounde fasi 'aco,
Mi roumprien vite lou coco!
Restarieou pas longtem en plaço.
O lei fremo, marrido raço!
Davan d'aqueou fèt acoumpli
Serié 'no faouto de febli.
Ei rèi dounarieou un eisèmple
Fachous. Dirien que sieou un tèmple!...
E bessai dins lou firmamen
Perdrieou leou lou gouvernamen!
Faou doun mouestra de caratèro!
Mai deja la grando coulèro
L'avié passa, e, quand vigué
La vieio testardo digué:
— Anen, ma boueno sieguès bravo!
— Si fè. — Vous proumeti 'no cavo:
Sortès e puei rintrarès mai.
Tenès! vous acoumpagnarai!
— Pa tant badaou! moun divin mèstre,