LEI TROUBAIRE MARSIHÉS Obro deis Encian, un Eissame de ...

E voudrias m'empacha d'agué 'icito un cantoun!
Aquelo serié 'n paou troou fouarto!
En parlan ensin su la pouarto,
Quichavo aoutan que va poudié;
Eme soun cuou fasié levié.
Madaleno èro espaloufido...
Jamai din soun ancieno vido
Avié' aousi quaoucarren de taou:
- Vouei, vouei, eici farai moun traou
Maougra sant Piarre eme sei claou,
Creidavo la vieio testardo!
Sant Piarre sentié la moustardo
Que li mountavo jusqu'aou nas.
Urousamen que Sant Toumas
Prengué parti per Ricoouqueto,
En diant: — La pichouno fremeto
Es enrajado de segu...
Semblarié meme qu’a begu!
Mai aguen un paou de pacienço,
E faguem lei cavo en counsienço!
Si renderon doun toutei dous
Prochi doou Dieou que su la crous
Mouré, per lou salut deis ome,
Lou bouen Dieou souené sant Jirome,
Qu’èro soun chèfe de bureou,
E toutei quatre en grand counseou
Toumberon d'acord qu’à la viergi
Foulié counfla lou messagi
De li faire entendre resoun
Vo de li douna un bouen saboun!
La Boueno-Mèro touto eimablo
Mouestré doun sa facho adourablo
A la vieio que, tèsto-aqui,
Voulié pa si leva d'aqui,
E que su la pouarto cougnavo:
— Ma santo fremo, acò ’s de cavo,
Li dis eme foueço douçour,
Que si fan pa ’ou divin sejour!
Sàbi que, quand vivias su terro,
Erias uno eicelento mèro;
Qu’avès agu pa maou d'enfant
Entre aoutre mai d’un capelan…
Mai aco suffis pa per èstre
Amesso enco doou divin mèstre.
Enca s’avias de prouteicien