LEI TROUBAIRE MARSIHÉS Obro deis Encian, un Eissame de ...

Serès countent, agués pa poou.
— Va ben, va ben, misé Martino,
Voueste pei a marrido mino
E mi semblo qu'es ba ben fres:
Per aoujourd'uei n'en voueli gès:
Mi prenés per uno toouteno,
De vous va dire mi fa peno:
La gaougno es blanco, l'uei maca,
En lou senten vous fa raca:
Crèsi que jamai de ma vido
Ai vis de cavo tant pourrido.
— Tè vé! Norino, Madeloun,
L'as entendu lou viei capoun?
Ti fa pa veni la castagno,
Lou maou de couar e la cagagno?
Apren que din la pescarié,
L'a pa gès d'aoutro porcarié
Que ta degoustanto carcasso.
O grand voulur, grosso coouvasso,
Longo facho de malomouar,
O viei corna! o foutu pouar!
L'a qu'un escapa de galèro
Vo ben l'enfant de cin cen pèro
Que poou dire de cavo ensin!
Ah! s'as cresu faire lou fin
En debitan tei talounado,
As maou coumença ta jornado,
Car sabi pa ço que mi ten
De ti roumpre lei quatre den
Que restoun din ta salo gulo!
Emé toun loun nas en virgulo,
Emé teis uei tout poutignous,
As pa l'er d'estre ben courous!
Regarda-lou, misé Roumano,
Li manco plu que la cooussano,
La barbo emé lei cascaveou
Per ana carga de gaveou!
Visiblamen, tout si gastavo;
La pescadoué que s'escaoufavo
Ti debanavo un cabudeou
Que poudié passa per dei beou.
Coupan sabié plu coumo faire
Per fa feni nouesto coumaire;