LEI TROUBAIRE MARSIHÉS Obro deis Encian, un Eissame de ...

L'OBRO DEIS ENCIAN
LEI VOUNGE-MILO VIÈRGI
Aquesto pichouno pouesio es estado emprimado en 1806 à Marsiho senso noum d'imprimour
nimai d'aoutour. N'a d'unei que l’atribuen à moussu l'aba Vigno:
Dous pelerin si rescountrèroun,
L'un espagnoou, l'aoutre francès.
Sàbi pa ben coumo faguèroun,
Aco semblavo fach esprès,
Dessu lei sant, grando disputo.
L'espagnoou, coumo bèsti bruto,
Vanto lei sant de soun peïs.
— Dins nouesto vilo de Paris
N'en aven mai que dins touto l’Espagno.
Lou rodoumoun prengué d'abord la lagno.
— Ti fachès pa, un sant ti noumarai
E de ta barbo un peou derrabarai.
A moun egard, tu n'en faras de meme,
Ges de gros mot, ges de blasfeme.
Lou francès coumencé, li noumo Sant-Marin
E, zou, vous li derrabo un crin.
— Santo Agato! santo Terèso!
— Ai fouche! li vas à cha dous,
S'escreidé lou francès, vilein, lache, rascous.
Eben! dins noueste dioucèso,
(Sa barbo aganto dei douei man)
Aven, dirai pa touei lei sant,
Aven, e brulas pa tant de quintaou de cièrgi,
Aven lei Vounge-Milo Vièrgi.
Touto la barbo derrabé
N'es pa à devina se l'espagnoou bramé.
L'OBRO DEIS ENCIAN
LOU COUNDANA A MOUART
Moun viei calen, dins la sorniero
Fasié lusi soun darnié lamp;
A vouas basso, lou capelan
Pregavo ei ped d'uno cadiero.
Ei plour que bagnavon seis uei,
Ai devina qu'èro aoujord'uei