LEI TROUBAIRE MARSIHÉS Obro deis Encian, un Eissame de ...

V. Valentin
LOU PEGOTIÉ E LOU FINANCIÉ
Fablo de Mèste Jan Lafouont travestido à la modo Marsiheso
Daou matin fin qu'aou souar
Un pegotié cantavo,
En va fasènt de tant bouon couar,
Qu'à lou vèire e l'aousi cadun si regalavo.
Lou vin lou rendié gai, laissavo l'aigo aou pous,
E su terro l'avié degun de tant urous.
Per contro, soun vesin qu'èro dins lei Finanço
Doou gouvèr de la Franço,
Toujour countavo seis escu;
Jamai cantavo, e dormié gaire;
De longo si plagnènt doou brut
Que desranjavo seis afaire.
Se voulié roupiha, perfés, su lou matin,
Lou pegot, coumo un gau, si metié mai en trin
De pica la semello en cantant sei refrin;
E noueste financié qu’eiço derrevihavo,
En renouriant, si demandavo
Qu'ouro aou Marca si vendrié lou dormi,
Coumo prouvèndo e boustifaio.
Sa vido ensin estènt pa gaio,
A soun bureou fagué veni
Noueste cantaire: — O bouon Mèste Jarjaio,
Li digué, voudrieou bèn vous croumpa vouestei cant;
Viguen, quant gagnas dins un an?
— Dins un an!... li fagué d'un èr de controdanso
Lou brave pegotié, — N'ai pa l'acoustumanço
De coumta coumo acò: Basto, un kilo de pan
E miejo de bouon vin vèngon m'empli la panso,
Que pousqui manja quand ai fam,
Mi souciti pa troou doou resto de l'annado;
Cade jour adué sa panado.
— Alor quant gagnas pèr journado?
— Un coou mai, un coou mens; lou maou es que toujour,
(E senso acò n'aourian de rèsto),
Lou maou es que dins l'an s'entremesclon de jour
Que faou chaouma; nous arrouinon en fèsto,
L'uno fa tort à l'aoutro, e Moussu lou cura
De quaouque sant nouveou cargo souvent soun prone,
Lou financié ravi de soun èr deslura,
Li di: Faou qu'aoujourduei vous mèti su lou trone;