LEI TROUBAIRE MARSIHÉS Obro deis Encian, un Eissame de ...

Lei prendrias pèr de negouciant;
Eh bèn, saurrès qu'es de... roufian.
Roufian! Sabès ce que vòu dire?
V'en dièu pa mai, m'avès coumprès;
Es de marrias, de triste sire
Que meriton que lou mespres;
Sueivon que la marrido pento,
L'a rèn que li fa prendre crento;
Poudrias li dire encaro mai,
S'en fouton pa mau dòu travai.
S'avès cresu que Marto fielo,
L'avès pa mes la man dessu;
Lei negouciant de pèu d'anguielo,
Lei prenguès pa pèr de moussu.
Es tout de paurei persounàji,
Sènso lituro e sènso usàji;
Franc dòu batèmo soun de muou,
Foueço orgueious, mai plèn de puou.
Tas de caiman, sias de la clico
Dei Cartoucho emé dei Mandrin,
Desounouras la republico,
Bando de gus e de gourrin.
Se coumandàvi des minuto
Vous fariéu parti, tout de sueito,
Vous mandariéu dins un païs
Que s'atrovo luen de Paris.
La soucieta serié purjado,
La Franço entiero aplaudirié
De si vèire desbarrassado
De tout aqueleis avarié,
Qu'en fet d'ounour n'en an pa gaire,
Vendrien sa sur emé sa maire
Maudi de Diéu, dóu mounde entié,
Soun pa de gènt, es de fumié!
MOURALO:
Pèr quant à iéu, d'aquelo raço,
N'en voudriéu plu veire la traço;
Seriéu countent mai que jamai,
Au mens veiriéu plu de brancai!!