LEI TROUBAIRE MARSIHÉS Obro deis Encian, un Eissame de ...

Soucieta 'n coumandito es-ti d'un nouvèu mot!
Lou carpourau si viro, enredis sa prestanço,
Si friso lei moustacho em'un biai de pieta;
Dreisso soun nas en l'èr e prenènt d'importanço,
Li digué: Sias toujour, meis amis d'abeta!
En qu vous serve alors: e la geografio,
E l'istòri de Franço, e ce que vous ai dis
De l'aritemetico e de l'astronomio:
Se n'en sabès rèn mai qu'un pauro cago-nis?
Sarès sempre gournau; sias de caricaturo;
Mai nonostant que sièu voueste superiour,
Pèr lors e bord que sian de la memo pasturo,
Voueli, subsequamen que mi faguès ounour!
A dounc escoutas-mi, durbès vouesteis òuriho
A moun resounamen, silènci dins lei rang!
Aquelo enstitucien es uno mereviho
De tòuti leis nacien; an rèn fa de mai grand.
Soucieta'n coumandito es dire qu'es fourmado
Emé dous elemen que dounon l'unita.
Lou proumié elemen souarte de la pensado,
Lou secound, qu'es l'argent, douno l'abileta.
Pèr lors, l'a lou gèrent, qu'es aquèu qu'a l'idèio,
E puei leis aciounàri, aqueli qu'an founça!…
— Mai viguen, carpourau, qu'es aquesto risèio,
Aciounàri, gerènt? voulès nous faire ana.
— Quand vous dièu que sias d'ai, qu'avès la tèsto duro;
Esperas, vous vòu faire uno demounstracien.
E tenès, justamen, uno idèio maduro
S'escapo de moun sup, pèr vouesto educacien.
As d'argent, Jòuselet? vai mi croumpa 'no pipo,
Tu tambèn, Bartoumièu? vai querre de taba;
Puèi lèu, m'atrouvarès au Cafè San-Félipo,
Mounte prendren ensèn, la gouto de cougna.
Parton e, coumo un lamp, dins quatreis encambado,
Leis vesès de retour emé sei prouvisien,
— Nous vaqui, carpourau; pèr faire de tubado,
Aven ce que nous fau; fès nous l'esplicacien.
— Vouei, mai viguen d'abord s’es vautrei lei bestiolo
Qu'avès agu proumié l'idèio qu'ai douna
De croumpa de taba? Vouesto sano draiolo,
Vous dis bèn qu'es ièu soul qu'ai lou dret de fumo.
Pèr lors sièu lou gerènt, vautrei, lei aciounàri,
Qu'avès douna l'argènt e fa lou capitau;
Vo, se preferas miès, sias lei coumanditàri
Que pagas ce que fau, pèr leis frès generau!…