LEI TROUBAIRE MARSIHÉS Obro deis Encian, un Eissame de ...

Mèste Louei.
Ditavo sei darrié desi.
— Aro, disié, mi fa plesi,
De leissa la vieiho bastido
A ma neboudo, Margarido...
A Jan, moun varlet bouon e fran,
Moussu, li leissi milo fran...
E fagué lei bardaou subran.
Mai Jan, souto lou lié, refasent senso crento
La vouas de sa mestresso, ajustè leou: De rento!
Lou noutàri 'scrivè senso veire l'ajust
E Jan agué de pan su la plancho, lou gus!
LA SOUCIETA EN COUMANDITO
Tres jouine campagnard, enfant de la Carliero,
Que fasien dins Paris soun mestié de sourda
S'èron proumes qu'ensen virarien lei carriero
Pèr fourma soun esprit, mai tambèn li bada.
L'avié coumo dirias aqui la fouarto tèsto;
Èu, èro carpourau; leis autrei tourlourou,
Embouitavon lou pas e d'uno cambo lèsto
Caminavon toujour, lou seguissien pèrtout.
Avien proun barrula; deja deis invalido
Avien vis lou toumbèu dóu grand Napoléoun;
Avien vis de Louqsor la longo piramido,
Coumo deis ome grand l'ilustre panteoun.
E l'Arco de Triounfle ounte lou pouont d'Arcolo
Si vis escrincela dins la peiro d'ounour.
E lou valènt tambour, soun òutis en bricolo
Que parei batre mai la cargo dei grandour.
L'Engèni de Juliet, plaço de la Bastiho
La colono Vendomo emé soun emperour,
Lei Musèu, l'espitau e l'oustau de Talio;
Avien vis tout Paris emé seis carrefour.
Mai vaquit qu'un bèu jour davan la Pepiniero
T'avison lou balcoun d'uno amenistracien,
Ounte si legissié: — La Bello Jardiniero,
Soucieta'n coumandito e de mai pèr acien.
S'arresteron dóu coup, e l'un dei cambarado
S'escridè: — Cap de noum, qu'es que vòu dire acò;
La Bello Jardiniero em' aquesto charado: