LEI TROUBAIRE MARSIHÉS Obro deis Encian, un Eissame de ...

(1860).
Payan Toussant.
Coumo es per faire uno blanqueto
Que vougue ben t'en douna la receto;
Car per lou fricassa saourieou pas m'en sorti
Serié fachous per ieou se m'en foulié pati,
Prend vint soou dedins ma bourseto;
Parte, vai leou. Retournaras
Tant vite que pourras.
Quand retourné de soun messagi,
Avant d'intra din soun vilàgi,
Si troubè subran lou besoun
De metre à bas soun pantaloun;
Daou temp que fasié sa fougasso,
Vetaqui qu'un gat negre passo,
L'empouarto lou leou d'escoundoun.
Uno noumado Madeloun,
Esten temouin d'aquelo afaire,
De l'estro li cridé: — Coumpaire,
Despachas-vous, embraias-vous ben leou,
Un gat vous empouarto lou leou,
S'en va, tout en vous fen ligueto.
— Laissas-li faire, eou crei mi talouna,
Respounde lou finas, saoupra pas lou coueina,
Dedin ma pocho ai touto la receto!
L'EISILA
Aqueou que n'a tasta, dei peïs troupicaou,
Saoup jusc’a quintou poueint dins lou jour li fa caoud,
E qu’un ome que doou matin à miejour casso,
Poou l'aganta la fam, la set e cambo lasso...
Un jour dounc, en cassant, èri dins aqueou cas:
Tout couelant de susour, mouart de set, e quant las!
D'agué tant barrula dins la brousso e la plano,
Quoure d’un paoure Indian avisi la cabano:
Es aquit propro, oumbrouso, entourado de flour.
Souto de cocotié sentent bouon la frescour,
Per moun corp alassa proumesso de delice.
D'un bound li sieou davant; soun mestre n'en sourtisse.
— Salud aou fraire Brun, li faou, per m’assousta
Vèni li demanda soun ospitalita.