LEI TROUBAIRE MARSIHÉS Obro deis Encian, un Eissame de ...

Loueis Margayan.
L’aurias pres eme lou capèu.
Coumo ver lou cur si viravo
Dins lou fué de seis argumen,
Tout à-n-un còu vis uno cavo
Que, pechaire, prengué sei sènt:
D'un fenestroun virant dins la pèço vesino
Vigué soun cler, mei bouons ami,
Qu'au bèu mitan de la cousino
Tout bouonamen s’èro endourmi
E que tout lou pouar si brulavo.
Qu'es que faire pèr lou sauva?
Coumo dins sa tèsto cercavo
Soun esprit va li fa trouva.
Proufité de ce qu'en cadiero
Avié lou dré de crida fouart.
Pèr dire: — Mai de que maniero
Eis enfant fès garda de pouar.
Se l'a quaucarrèn que detesti
Es quand viéu qu'avès lou sang-fré
De laissa manja vouestei bèsti
Dins lei champ mount'avès pa dré.
Mai, pamens, s'èrias caritable
Sauprias que voulas lou vesin
E que Satan roustis lou rable
D'aquelei qu'agisson ensin.
Mei fraire, es uno cavo gravo,
Pensas li dins lou foun dóu couar
E s'un còu mai vous arribavo.
Cridas: — Pichoun, viro lou pouar!
E cridé d'uno vouas tant fouarto
Que la glèiso n'en cranihé,
Que fagué durbi la grand' pouarto,
E que Tistoun si revihé!
*