LEI TROUBAIRE MARSIHÉS Obro deis Encian, un Eissame de ...

Mai lou brave moussu Fornièro
— Ero lou noum doou capelan —
Juste avié ges de cousiniero:
E fa que noun èro alesti
Per pousqué vira soun rousti,
Car li foulié dire la messo,
Pamen la brocho uno fès messo
Lou boués abra que tout prenié bouen er
Ané carga d'aquel ooufici,
Per lou temp qu'eou dirié l'ooufici,
Tistoun, un de sei pichoun cler.
Va ben. S'en va dire la messo.
Aou mitan coumo fan toujour,
Noueste cura plen de sagesso,
Preché l'evangile doou jour;
Ero dessu l'ooubeissenço
E su d'aqueou coumandamen,
Mounte Dieou nous fa la defenço,
Lou ben de prène injustamen
Su d'un sujet tant remarcable,
Pensas, lou sermoun èro beou,
L'oouditòri considerable:
L'aourias près emé lou capeou.
Coumo vès lou chœur si viravo,
Din lou fué de seis argumen,
Tout à n’un coou vis uno cavo
Que pechaire! prengué sei sens!
D'un fenestroun, virant din la pèço vesino
Vigué soun cler, mei bouens ami,
Qu'aou beou mitan de la cousino,
Tout bouenamen s'èro endormi,
E que tout lou pouar si brulavo.
Mai que faire per lou saouva?
Coumo din sa tèsto cercavo
Soun esprit va li fe trouva:
Proufité de ço qu'en cadièro
Avié lou dret de creida fouart
Per dire: — Mai de que maniero,
Eis enfant fès garda lei pouar?
Se l'a quaoucarren que detesti,
Es, quand vieou qu'avès lou sang-fré
De laissa manja vouestei bèsti
Din lei champ mounte avès pa dré.
Mai pamen s'erias caritable,
Saouprias que voulas lou vesin
E que Satan roustis lou rable