LEI TROUBAIRE MARSIHÉS Obro deis Encian, un Eissame de ...

Aquelei dous prepau vènguèron à l'auriho
De moussu Pascalet, que si proumete bèn,
Lou dimenche venènt de faire mereviho
En mouestrant à sei gènt ce qu'èro aquéu valènt.
Adoun eis autrei vespro à l'ouro acoustumado
La glèiso èro cafido à n'en pa mai teni,
Quand lou cura mounte dins soun escalo amado,
D'ounte poudié, de Diéu, soun pople entreteni:
Mei fraire, acoumencé l'a just uno semano,
Qu'eici vous ai mouestra la santo Trinita,
Trelusento au mitan dei celesteis andano,
Escampan sei rai d'or, su nouesto umanita.
Cresiéu vous avé fa penetra dins iéu meme
En vous mouestrant qu'en Diéu tres persouno l'avié:
Lou paire emé lou fiéu, l'esprit sant lou tresieme
Ce que fourmavo bèn lou mistèri en entié.
E bèn noun, vai sachu, m'an proun mes en derouto,
En dian que sàbien pa se parlavi resoun,
Qu'èri bessai estré… qu'uno tèsto de bouto,
N'en sàbié foueço mai que mei simplo òuresoun.
Que dire, anas léu vèire, em'uno autro figuro,
Que mi siéu pa troumpa; que dins moun jujamen,
Toujour ai pèr draiolo uno sano naturo
Que mi fa camina dins lou verai tous tèmp.
Vous ai di, vous souvèn, qu'emé lei tres persouno
Si fourmavo un soul Diéu, vous l'ai proun esplica
Au mejan d'uno fourco emé sei tres dentouno;
Mai, bord que n'avès ri voueli mies vous touca.
Vesès bèn davan iéu, aquéu drole de mounje
Que si di saberu, que souarte de qu saup,
Que s’avise à parla de moussu lou canounje
Coumo s'avien touei dous ensen fouira lou sòu.
Es descau tau qu'un chin, crus e nus, sènso vano;
Es sangla coumo un ai, que ti crèbo la fam;
Es barbu coumo un bouc, que trèvo lei chavano
E pamens n'es rèn mai qu'uno bèsti tout l'an.