sounet - Université de Provence

AU MEME
SOUNET
TAMBÈN nautre trasian peno d’elo, o moun fiéu,
E de l’aubo au tremount pregavian lou bon Diéu.
Diéu siegue benesi: Fifinoto es garido
E se ris de la Mort, la vielano abourrido.
«Un pau pu tard, ié dis, me vendras querre iéu.
Me fas pas pòu, leidasso, emé toun èr catiéu:
Lou Printèms tout-bèu-just d’ile e de margarido
A jita sus mi pas sa canasto flourido;
Un jour, à peno un jour, ai senti si perfum.
D’aut! pelado, envai-t’en, d’aut! d’aut!» E, coume un fum,
A la voues de l’enfant, fuso la Descarado…,
Mai, d’abord que devèn, es vosto lèi sacrado,
Un iuei, l’autre deman, plega davans la Mort,
Segnour bon, pèr li miéune aliuenchas lou mau-sort!
1873.