sounet - Université de Provence

LOU VIOULOUNAIRE
A Jan GAIDAN, de Nimes.
MOUN grand, davans Diéu siegue! èro dru coume un gau;
Pèr rire e galeja n’avié pas soun egau.
Quand la bravo Goutoun, sa mouié, lou charpavo
Sus soun pau de soucit, éu subran arrapavo
Sa courroubio acroucado au clavèu dóu fougau
E’n rasclant ié cantavo un refrin fouligau.
Pas mai que de l’ausi la fougno descampavo...
Au brut de soun vióuloun tout lou quartié trepavo.
Ah! que n’a fa sauta de fiho e de garçoun,
Dins Nime i’avié pas uno vogo, uno fèsto,
Que noun mèste Roumiéu; galoi coume un quinsoun,
I’anèsse faire entèndre un èr de sa façoun.
D’aqui vèn que de-fes ma Muso es un pau lèsto:
Tire d’éu moun amour di bello e di cansoun.
1873.