sounet - Université de Provence

A LA MEMO
SOUNET
DINS lou negre païs dóu fum e di castagno,
Qu’assavènio Mirèio e mascaro Jouanen,
Sus li bord dóu Gardoun, au pèd de la mountagno
Qu’un soulèu espandis sa courouno d’argènt,
Sènte au founs de moun amo espeli la cantagno,
E rèste mut pamens, Naïs; car m’ensouvèn
Que liuen de noste nis toun paure cor se lagno,
Quand d’asard l’adessias peirenau noun te vèn.
De-que me fai alor la visto di Ceveno,
Se, pèr lis amira, te trase dins la peno?
Que davans iéu lou riéu cascaie en s’esquifant;
Que, cremant, dins lis èr beluguejon li serre:
Vese rèn, n’ause rèn que lou camin de ferre
Esperant mi poutoun pèr vautre, o mis enfant!
1874.