sounet - Université de Provence

Perqué pas mouri? Perqué de la vido
Ai-ti poussiga lou triste lindau?
Perqué dins lou dòu moun amo aganido
S’es tant agrimpado à moun cors malaut?
Ah! quand tout lou jour me siéu tirassado
D’uno porto à l’autro en lagremejant,
E que ma preièro es pas escoutado,
Que rintre à l’oustau sènso un tros de pan,
A bèu à ploura ma voues pietadouso:
Ai, pèr m’assoula, jamai res, moun Diéu!
Ni fraire fidèu, ni sorre amistouso:
Toujour pas que iéu! toujour pas que iéu!…
Quaucun m’a bèn-di: — «Que sariés urouso
S’à moun cor vouliés baia toun amour!
Pourriés metre au fiò ta raubo peiouso:
Auriés proun d’escut pèr seca ti plour!
Saupriés plus de-qu’es la fam que matrasso;
Pèr tu, bello enfant, tout sarié plesi;
Dóu bonur pourriés acaba la tasso:
Te faire adoura sarié toun soucit!
Oh! vène emé iéu!...» — Mai sa voues en flamo
Me diguè quicon tant orre e tant laid,
Que traguère pòu alor pèr moun amo,
E moun amo, iéu, acò ‘s tout ço qu’ai!…
Tambèn prenès-la, moun Diéu, vous la done!
A ma pauro voues quand tout rèsto sourd,
Perqué pas mouri? Que moun ouro soune,
E qu’eilamoundaut vèngue pèr toujour!…
Car, pechaire! eici, doulènto ourfanello,
Ai, pèr m’assoula, jamai res, moun Diéu!
Ni fraire amistous, ni sorre fidèlo:
Toujour pas que iéu! toujour pas que iéu!
1857.