sounet - Université de Provence

E bèn! de-que pènses d’acò?
Dins quàuqui jour veiran l’espaso e lou shakò
Au Felibre de la Tourmagno!…
Aro sian plus au tèms ounte li troubadour
Pèr touto armo avien… sa quitarro:
Sian felibre dóu bon, nautre; chin gasta, garo!
Fau que vous crèbe lou tambour!…
«De-que’s aquéu briquet! van dire li lengueto,
Fau que toujour tire d’avans!
Pourren dounc pas jamai espóuti lou tavan
Que de-longo nous fai ligueto?…»
E lou tavan lusènt, sèns soucit di galous,
S’espoumpira dins li carriero;
E, lèste coume un lamp, franquira li barriero
Aubourado pèr li jalous!…
Pièi, dins soun outalet, soun bèu nis de famiho,
Dira, coume sèmpre, au bon Diéu:
«Leissas-me parteja mi triounfle entre iéu,
Ma femo, mi drolo e mi fiho!…»
14 de Juliet 1870.