sounet - Université de Provence

Trasès li bèn que reclaman?...
En de-que sièr douno la courouno?
Avèn set, avèn fam;
Baias-nous de que viéure
Mai noun sian afama de pan;
Mai noun sian asseda d’abéure:
Ço que nous fau, pàuri deseireta,
Es lou neitar d’amour, lou pan de liberta!
O pastourello dóu cor tèndre
Que caminas vers Betelèn,
Pourrias, se voulias nous atèndre,
Apasima nosto talènt...
Mai refusas de nous entèndre!
Avèn set, avèn fam;
Baias-nous de que viéure!
Mai noun sian afama de pan,
Mai noun sian asseda d’abéure:
Ço que nous fau, pàuri deseireta,
Es lou neitar d’amour, lou pan de liberta!
Pas uno bono amo sus terro!...
Tu, dóu mens, o divin Enfant,
Basto ! ausigues nosto preiero,
E nòsti mau s’ameisaran,
E calara nosto misèro!
Avèn set, avèn fam;
Baio-nous de que viéure!
Mai noun sian afama de pan;
Mai noun sian asseda d’abéure!...
E l’Enfantoun: — Sias plus deseireta,
Ié fai — prenès à bóudre Amour e Liberta!
1869.