par Charles Dickens - wikia.nocookie.net

La foco es vera multe basa: apena un foco per un note tan fria. Scrooge es obligada de senta
prosima a el, e medita triste supra el, per pote estrae un sensa de caldia la plu peti de un tal
plenimano de combustable.
La ximineria es un vea, construida par alga mercator nederlandes en la pasada distante, e
paveda a tota lados con telias nederlandes anticin, desiniada per pituri la scrivedas santa. Ave
Caines e Abeles, fias de Faraon, reas de Saba, mesajores anjelin desendente tra la aira sur nubes
simil a letos de plumas, Abrahames, Baltasares, apostoles ci comensa viajes sur mar en boles de
bur, sentos de figures per atrae se pensas; e, an tal, acel fas de Marley, mor per sete anios, veni
como la basto de la profeta antica, e engoli tota. Si cada telia lisa ta comensa blanca, con la
capasia de formi alga pitur sur se surfas par la fratos nonliada de la pensas de Scrooge, ta ave un
copia de la testa de Marley Vea sur cada.
"Babela!" – Scrooge dise, e traversa la sala.
Pos alga verjes, el senta denova se. Cuando el apoia se testa a retro en la seja, se regarda
reposa acaso sur un campana, un campana desusada, cual pende en la sala e comunica, per alga
razona aora oblidada, con un camera en la nivel la plu alta de la construida. Es con stona grande,
e con un teme strana e nonesplicable, ce, an cuando el regarda, el vide esta campana comensa
penduli. El penduli tan jentil a la comensa ce el fa apena un sona; ma pronto el resona forte, e
cada campana en la casa fa la mesma.
Cisa esta dura per un dui de un minuto, o un minuto, ma el pare como un ora. La campanas
sesa como los ia comensa, en junta. Los es segueda par un tintina basa e metal, profonda a su,
como si algun tira un cadena pesos sur la bariles en la susolo de la mercator de vino. Scrooge
recorda alora ce el ia oia ce on descrive fantasmas en casas infestada como si los tira cadenas.
La porte de la susolo abri rapida con un sona bumante, e alora el oia plu forte la ruido, sur la
solos a su; alora el asende la scalera; alora el avansa direta a se porte.
"Es ancora babela!" – Scrooge dise – "Me no va crede el."
Ma se color cambia cuando, sin pausa, la movente continua tra la porte pesos, e veni en la
sala ante se oios. A se entra, la flama morinte salta, como si el cria – "Me conose el: la fantasma
de Marley!" – e cade denova.
8